Kinansela na ni Valenzuela City Mayor Rex Gatchalian ang nakatakda sanang pulong sa pamunuan ng North Luzon Expressway Corporation ngayong araw, December 10.
Kaugnay ito ng sinuspindeng business permit ng kumpanya dahil sa idinudulot na mabigat na trapiko ng mga aberya sa kanilang RFID system.
Nag-ugat ang pasiya ni Gatchalian sa naging pahayag ni Metro Pacific Tollways Corporation Chief Communications Officer Romulo Quimbo sa posibilidad ng kanilang pagdulog sa korte at humiling ng temporary restraining order.
Ayon kay Gatchalian, hindi natatakot ang lokal na pamahalaan ng Valenzuela City sa naturang banta ng NLEX dahil kaya nilang idepensa sa korte ang kanilang naging aksyon.
Aniya, tiwala siyang mayroong matibay na ligal na batayan ang kanilang pasiya na suspendihin ang business permit ng NLEX corporation.
Dagdag ni Gatchalian, hindi niya maunawaan ang pakay ng NLEX corporation na humihiling ng diyalogo sa kanya pero pina-aaralan din ang pagsasampa ng reklamo sa korte.