Iniharap ng Philippine National Police o PNP sa publiko ang sub-leader ng Maute Group sa Tondo Maynila.
Ayon kay PNP Chief Director General Ronald Dela Rosa, batay sa pahayag ni Nasser Lomondot alias Mohamad, pagtatago lamang ang pakay niya dito sa Metro Manila at hindi upang maghasik ng kaguluhan.
Natatakot di umano si Lomondot sa kanya at sa buhay ng kanyang pamilya kaya’t nagpasya silang lumuwas ng Metro Manila upang makaiwas sa bakbakan.
Sa kabila nito, sinabi ni Dela Rosa na hindi pa rin nila inaalis ang posibilidad na may planong mag-recruit ng bagong miyembro si Lomondot kaya’t narito siya sa Metro Manila.
(Ulat ni Jonathan Andal)
Recruitment process
Samantala, maigting na tinututukan ng militar ang posibleng panibagong paglusob ng Maute-ISIS Group sa ibang lugar sa Mindanao.
Kasunod ito ng natanggap na ulat ng militar na patuloy ang recruitment operation ng Maute-ISIS Group hindi lamang sa Lanao del Sur kundi maging sa ibang lalawigan sa Mindanao.
Ayon kay Philippine Army Chief Lieutenant General Rolando Bautista, batay sa kanilang impormasyon umaabot na sa Basilan, Sulu at Sultan Kudarat ang mga ginagawang recruitment ng nasabing teroristang grupo.
Tiniyak pa ni Bautista, patuloy din ang kanilang mahigpit na pagbabantay sa Marawi City lalo’t nananatili pa rin ang banta ng posibleng pag-atake muli ng Maute-ISIS Group sa lungsod.
Hindi rin aniya nila iiwanan ang marawi hangga’t hindi pa natatapos ang rehabilitasyon nito.
By Krista de Dios