Pinuri ng Department of Interior and Local Government (DILG) ang pamahalaang lungsod ng Maynila matapos ideklara bilang persona non grata ang grupong Panday Sining.
Ayon kay DILG spokesperson Undersecretary Jonathan Malaya, malinaw na ipinakikita ng naging hakbang ng Manila City LGU na hindi nila kailanman kukonsentihin ang anumang paraan ng pagdungis sa ganda ng lunsod.
Sinabi ni Malaya, panahon na para tumulong ang taumbayan sa mga proyekto ng pamahalaan kung saan nagsisimula ito sa pagdidisiplina at pagpapanibago sa sarili.
Binigyang diin ni Malaya na inabot ng mahigit 15 taon bago lubusang nalinis ang Lagusnilad underpass at gawing mas accessible at maginhawa para sa publiko ang iba pang mga lugar sa Maynila.
Kaya naman hindi aniya katanggap –tanggap na dudungisan at lalagyan ng bandalismo ang mga nabanggit na pampublikong lugar sa loob lamang ng halos isang minuto.
