Magdaragdag ng 200,000 doses ng bakuna kontra coronavirus disease 2019 (COVID-19) mula sa AstraZeneca ang lokal na pamahalaan ng Muntinlupa.
Ayon kay Muntinlupa Mayor Jaime Fresnedi, nag-request na anila ang lokal na pamahalaan ng dagdag na 200,000 doses kasama ang 100,000 doses na una na nilang ini-order, kaya’t umabot na sa kabuuang 300,000 doses ang para sa lungsod ng Muntinlupa.
Ito ay kasama pa din sa naunang isinagawang tripartite agreement kasama ang National Task Force against COVID-19 at British pharmaceutical na AstraZeneca.
Samantala, mayroon ng 28 health workers mula sa City Health Office ng Muntinlupa ang natapos na sa kanilang training para sa pagpapabakuna ng COVID-19.
