Iminungkahi ni Sen. Francis Tolentino sa Korte Suprema na gawing online na lamang ang bar examination bilang pag-iingat na rin sa COVID-19.
Inihayag ito ng senador kay Supreme Court Chief Justice Diosdado Peralta sa gitna ng talakayan hinggil sa 2021 proposed budget para sa hudikatura na nagkakahalaga ng mahigit P43-B.
Ayon kay Tolentino, tiyak na mapangangalagaan ang kaligtasan gayundin ang kalusugan ng mga kukuha ng bar exams.
Sa katunayan ayon kay Tolentino, ginagawa na ang online bar exams sa iba’t-ibang lugar sa Estados Unidos tulad sa Michigan, District of Columbia, Louisiana at New York.
Pinaboran naman ito ni Peralta sabay sabing balak nilang idaos ang online bar examinations sa buwan ng Nobyembre ng susunod na taon sa Maynila gayundin sa ilan pang mapipiling lugar sa Visayas at Mindanao.