Tutol ang Commision on Elections (COMELEC) sa hirit na gumamit ng ‘multiple days’ o maraming araw sa pagboto.
Ayon kay COMELEC Spokesperson James Jimenez, buo na ang kanilang desisyon lalo’t ang binabalangkas na guidelines ay nakatuon sa mas mahabang araw.
Imbes anya na ala-6 ng umaga hanggang alas-3 ng hapon ang halalan tulad nang nakagawian, maaaring maging 12 oras na ito o mula ala-6 ng umaga hanggang ala-6 ng gabi.
Ipinunto ni Jimenez na mas maraming legal at security issues ang kahaharapin ng poll body kung magpapatupad ng multiple election days at naka-depende pa rin ito kung tatanggapin ng mga botante.
Aminado rin ang COMELEC official na lolobo ang budget para sa mga guro na magsisilbing Board of Election Inspectors kung gagawing tatlong araw ang botohan. —sa panulat ni Drew Nacino
