Panahon na upang pangalanan at papanagutin ang lahat ng mga nakinabang sa maanomalyang pagpapatupad ng Priority Development Assistance Fund o PDAF at Disbursement Acceleration Program o DAP ng nakalipas na administrasyon.
Ito ang kapwa inihayag nila Quezon City Representative Winston Castelo at Surigao del Norte 2nd District Representative Robert Ace Barbers kasunod ng hakbang ng Department of Justice o DOJ na muling buksan ang imbestigasyon hinggil dito.
Ayon kay Castelo, bagama’t ginagalang at suportado nila ang naging pasya ng DOJ na usigin ang mga lumustay sa pondo ng bayan, dapat maging maingat naman ito at huwag pag-initan ang mga taga-oposisyon.
Para naman kay Barbers, mainam na masilip na rin ng DOJ ang iba pang mga anomalyang kaakibat ng dalawang nasabing programa na una nang idineklarang labag sa batas ng Korte Suprema.
—-