Hindi pabor si dating Ombudsman Conchita Carpio Morales na buwagin na ang kaniyang dating tanggapan dahil sa pangambang lalong lalaganap ang korapsyon.
Ito’y matapos ipahayag ng kasalukuyang Ombudsman na si Samuel Martires na dahil walang halos tumetestigo sa mga reklamo ay mabuti pang isara na lang ang Office of the Ombudsman at magkaniya-kaniya na lang ang bawat ng tanggapan ng gobyerno sa paglaban sa korapsyon.
Ayon kay Morales, mas magiging malaya lamang ang mga tiwaling opisyal ng gobyerno na magnakaw sa kaban ng bayan kapag binuwag ang Ombudsman.
Lumalabas din aniya na tila nagiging polisiya na ni Martires ang pag-dismiss sa mga reklamo laban sa mga inaakusahang opisyal ng gobyerno.
Iginiit din ni Morales na mahalaga ang statement of assets, liabilities and net worth (SALN) sa paghabol sa mga tiwaling opisyal.
Magugunitang iniutos ni Martires kamakailan ang mas mahigpit na patakaran sa pagkuha ng saln dahil nagagamit lang umano ito sa pulitika.
