Kumpiyansa pa rin ang pamahalaan na maililigtas ng mga sundalo ang nalalabing bihag ng Maute terror group na nasa main battle area sa Marawi City.
Sa ginawang Mindanao Hour sa Malacañang, inihayag ni AFP Spokesman Maj/Gen. Restituto Padilla, tuloy pa rin ang operasyon sa Marawi at pursigido silang tapusin iyon sa lalong madaling panahon.
Mataas din aniya ang morale ng mga sundalo dahil sa ipinangako ni Pangulong Rodrigo Duterte na bibigyan sila ng bakasyon upang makasama ang kanilang pamilya.
Magugunitang sinabi ng Pangulo sa kaniyang pagbisita sa Marawi City kamakailan na pagbabakasyunin niya sa Hongkong ang mga sundalong nakipagbakbakan sa Maute group ng halos limang buwan.