Wala pang pangangailangan sa ngayon para gawing 24 oras ang pagbabakuna sa lungsod ng San Juan.
Ito’y ayon kay San Juan City Mayor Francis Zamora ay bunsod ng inaasahang pagdami ng mga babakunahan sakaling buksan na ang pagbabakuna sa mga nasa A4 category.
Ayon sa Alkalde, sapat pa naman ang kanilang mga tauhan na nakaposte sa Filoil Flying V Center na kasalukuyang nakapagsasagawa ng 1,800 na bakuna kada araw.
Subalit inaasahang tataas pa ang nasabing bilang sa sandaling magbukas na ang kanilang vaccination hub sa Greenhills Shopping Center sa unang linggo ng Hunyo.
Nagbabala naman si Zamora sa kaniyang nasasakupan na mag-ingat sa mga kumakalat na bentahan umano ng mga bakuna via online dahil malinaw aniyang scam ito.
Nakipag-ugnayan na aniya sila sa Philippine National Police o PNP at sa Department of Health upang ganap na masukol at mapanagot ang nasa likod nito.
