Iniimbestigahan na ng PNP o Philippine National Police ang mga pulis na pinaghihinalaang kasabwat ng Maute terror group.
Ito ay ayon kay PNP Chief Director General Ronald ‘Bato’ Dela Rosa, matapos madiskubre ang isang ID ng pulis na may ranggong PO1 sa isang bahay sa Marawi City na pinagkutaan ng mga terorista.
Ani Dela Rosa, nagbalik Islam pa ang nasabing pulis bago ito mag-AWOL noong 2014 na posibleng ni-recruit sa Maute ng isa pang pulis na taga-Basilan.
Dagdag pa ni Dela Rosa, mahigit sa isa ang posibleng kasabwat na pulis ng mga terorista at isinasailalim na ngayon sa counter intelligence operations.