Pinag iingat ang mga Pilipinong nasa Hong Kong kaugnay sa umano’y nakakahawang sakit sa China.
Ang nasabing sakit ay isang uri ng viral pneumonia na kumakalat at nagmula sa Wuhan sa China.
Dahil dito, itinaas ang serious response level sa Hong Kong dahil sa posibilidad na kumalat ang sakit at magdulot ng public health emergency.
Ipinabatid naman ng Philippine Consulate General sa Hong Kong ang inisyung plano ng Hong Kong government para sa paghahanda at pagtugon sa nasabing sakit.
Tiniyak ng konsulado na magbibigay ng update ang Hong Kong government sa publiko hinggil sa patuloy na pagsusuri sa nasabing sakit.
Pinayuhan din ang mga Pilipino na alagaan ang kalusugan at maging maingat sa paghahanda ng pagkain.
Kung may tanong naman at para sa update hinggil sa sitwasyon ng sakit, u-ubrang magtungo sa website ng Hong Kong Centre for Health, samantalang puwede ring tumawag sa Philippine Consulate General Hong Kong hotline na 852 9155 4023.
Hanggang sa ngayon ay hindi pa rin natutukoy ng mga otoridad kung saan nanggaling ang virus ng misteryosong sakit sa China.
Ayon kay Health Undersecretary Eric Domingo, maging ang World Health Organization (WHO) ay hindi alam kung anong klaseng virus ito.
Aniya, nagnegatibo naman sa Avian flu, Severe Acute Respiratory Syndrome (SARS), Middle East Respiratory Syndrome (MERS) ang mga nakitaan nito.
Samantala, napag alaman na galing ang mga ito sa isang restaurant kung saan nagbebenta ng mga buhay na hayop.
(Contributor: Gene Margarette Cruz)
