Dagsa na ang mga pasahero sa iba’t ibang pantalan sa buong bansa ilang araw bago ang Semana Santa.
Batay sa huling datos ng Philippine Coast Guard (PCG) aabot sa halos 90,000 na ang bilang ng mga pasaherong nagtutungo sa pantalan upang makauwi sa kani-kanilang mga lalawigan
Kabuuang 89,125 ang naitala ng PCG Linggo ng umaga kung saan pinakamarami sa Western Visayas na may 18,760.
Sinundan ito ng Central Visayas na may 15,746.
Habang nasa 15,672 ang naitala sa South Eastern Mindanao at 11,065 naman ang mga pasahero sa Southern Tagalog.
Dahil sa patuloy na pagdagsa ng mga pasahero, paalala ng PCG sa mga nakatada pa lang bumiyahe ay magtungo sa pantalan tatlong oras bago ang boarding time.
Para naman makaiwas sa abala sa inspeksyon, iwasang magdala ng mga ipinagbabawal na gamit gaya ng flammable liquid, solid at compressed gases, explosives baril at mga bala nang walang kaukulang dokumento at clearance.
—-