Tukoy na ng Philippine National Police o PNP kung sinu-sino ang mga rice hoarder at miyembro ng cartel ng bigas.
Inihayag ito ni Senior Superintendent Benigno Durana Jr., Spokesman ng PNP kasunod ng direktiba ng Pangulong Rodrigo Duterte sa kanyang State of the Nation Address o SONA na tugisin ang mga nagtatago at nagmamanipula sa presyo ng bigas.
Gayunman, tumanggi si Durana na pangalanan ang mga rice hoarders at miyembro ng cartel upang hindi mabulilyaso ang kanilang operasyon laban sa mga ito.
Ayon kay Durana, patuloy ang pangangalap nila ng mga ebidensyang magdidiin sa mga nang-iipit ng supply at nagmamanipula sa presyo ng bigas.
—-
