Iminungkahi ni Marikina Representative Bayani Fernando ang pagsunog sa lahat ng mga kolorum na pampublikong sasakyan.
Ayon kay Fernando, ito’y upang masolusyunan na ang pagsisikip ng daloy ng trapiko sa Kamaynilaan na idinudulot ng mga walang linyang sasakyan.
Giit ng mambabatas, seryoso ang kanyang ihahaing panukalang batas na sunugin ang mga kolorum na pampublikong sasakyan tulad ng bus, jeep at taxi, lalo na kapag lumabag sa batas trapiko.
Para matigil na ang kabi-kabilang lagayan, isinusulong din ni Fernando ang pagbibigay ng prangkisa sa lahat ang mga transportasyon para hindi na tago nang tago ang mga ito.
Binigyang diin pa ng kongresista na hindi sapat ang isang milyonng multa sa mga kolurum na sasakyan dahil kayang-kaya naman itong bayaran ng mga bus operator at magagawan pa rin ng paraan para matubos ito.
Ipinaliwanag naman ni Fernando na hindi marahas o malupit ang kanyang panukala dahil hindi naman tao ang nais niyang sunugin.
By Jelbert Perdez
