Inihayag ni Department of Information and Communications Technology (DICT) Usec. Anna Mae Lamentillo, na wala nang expiration ang mga irerehistrong sim card simula sa December 27, 2022.
Ayon kay Lamentillo, kung ganap na itong mai-rerehistro sa susunod na linggo, walang magiging problema sa mga sim card kahit hindi umano makapag-load ng ilang buwan.
Sa kasalukuyan, nasa dalawa hanggang anim na buwan lamang ang tinatagal ng sim cards kung hindi nakapag-load dahil nag-eexpire na ang mga ito o gagawin na itong deactivated ng mga telecommunications company o telco.
Sinabi ng opisyal na sa December 27, ang mga nakabili ng maraming sim card ay bibigyan lang ng anim na buwang palugit para irehistro ang lahat ng nabiling sim sa mga registration centers.
Idinagdag pa ni Lamentillo, na plano rin ng ahensya na magtayo ng registration centers sa malalayong lugar sa loob lamang ng animnapung araw o katumbas ng mahigit dalawang buwan.
Nagpaalala din sa publiko ang opisyal na ang mga magpaparehistro ay kailangang magpakita ng valid id’s para mairehistro ang kanilang mga sim card.
