Inihayag ng Armed Forces of the Philippines (AFP) – Western Command na nabawasan na ang mga barko ng China na nagkukumpulan sa West Philippine Sea (WPS).
Nabatid na namataan ang mga Chinese vessel sa Iroquois Reef at Sabina Shoal na malapit sa Palawan at bahagi ng WPS.
Ayon sa mga Coast Guard personnel, makailang beses na nilang binalaan ang mga barko ng China na umalis na sa lugar na bahagi ng Exclusive Economic Zone ng bansa pero binabalewala umano sila ng mga ito bagay na ikinabahala ni Department of National Defense (DND) Officer-in-Charge Senior Undersecretary Jose Faustino, Jr.
Sinabi ng opisyal na nagpapatuloy ang Maritime and Aerial Surveillance ng mga tauhan ng AFP, PCG at DND sa West Philippine Sea kung saan, may ilang barko parin ng China ang nananatili sa mga nabanggit na lugar.
Nilinaw naman ni Faustino na bukas ang Pilipinas sa pakikipag dayalogo hinggil sa ginagawang aktibidad ng China na paglabag umano sa karapatan sa soberanya, at hurisdiksyon ng Pilipinas.
