Sa gitna ng patuloy na pag-aalburoto ng Bulkang Mayon, unti-unti nang nagkakasakit ang karamihan sa mga evacuees dahil sa siksikan at pagtagal pa ng pananatili nila sa mga evacuation centers.
Pinakamaraming evacuees ang naitala sa Tabaco City na mayroong halos limandaang pamilya o 1,793 na indibidwal na nananatili sa mga itinalagang evacuation centers sa buong bayan.
Sa nasabing bilang, lima hanggang pitong porsyento sa mga nagkakasakit ang hindi pa rin nagagamot, kaya naman minamadali na rin ng Tabaco City Health Office ang pagpapadala ng mga bakuna.
Paliwanag ni City Health Office Officer-in-Charge Liezel Loria Cuales-Duncan, basta’t naka-flu vaccine na ang mga may sakit, unti-unti nang mababawasan ang nararamdaman nilang sintomas.
Sa kasalukuyan, nananatili pa rin sa Alert Level 3 ang Bulkang Mayon kaya mahigpit na ipinagbabawal ang pumasok sa 6-kilometer Permanent Danger Zone nito dahil sa panganib mula sa mga ibinubugang pyroclastic density currents, rockfalls, lava flows, at iba pang volcanic hazards.
