Maglalaan ang Department of Education ng siyam na bilyong piso para sa pagpapatupad ng Academic Recovery and Accessible Learning o ARAL Program sa lahat ng public basic education institutions ngayong taon.
Layon ng ARAL Program na mabigyan ang mga estudyante, mula kindergarten hanggang Grade 10, ng libreng tutorials sa pagbasa, mathematics, at science.
Ayon kay Education Secretary Sonny Angara, makakatulong ang nasabing programa para makahabol ang mga batang Pilipino na maabot ang mga kakayahan at galing na inaasahan sa kanilang grade level.
Aniya, labis na kailangan ng bansa ang programang ito lalo’t napatunayan nang nahuhuli ang mga batang Pinoy pagdating sa larangan ng pagbasa at mathematics.
