Pinag-su-submit ng Metropolitan Manila Development Authority ang mga mall sa loob ng National Capital Region ng kanilang mga traffic management plan bago magpatupad ng mga mall-wide sale sa mga weekend na napapaloob sa peak Christmas rush.
Ayon pa kay MMDA Traffic Enforcement Group Head Victor Nuñez, pinagbabawalan din ng ahensya ang mga mall na mag-sale sa weekdays upang iwasang lumala ang daloy ng trapiko tuwing December holiday season.
Dagdag pa ni Nuñez, kung magkakaroon ng sale ang mga mall, dapat maisumite ng mga ito ang kanilang mga traffic management plan sa MMDA dalawang linggo bago ang takdang petsa ng sale.
Ito anya’y para makapagplano ang ahensya ng mga alternatibong ruta upang maiwasan ang pagsikip ng daloy ng trapiko.
Inanunsyo ng MMDA ang nasabing direktiba matapos nagmistulang parking lot ang Marcos Highway noong nakaraang weekend dahil sa magkakasabay na sale sa mga mall sa kahabaan nito. —Sa panulat ni Anjo Riñon
