Humarap sa Department of Justice ang may-ari ng Mighty Corporation na una nang iniutos ni Pangulong Rodrigo Duterte na arestuhin dahil sa umano’y economic sabotage.
Iniwasan ni Alexander Wong Chu King ang media at agad na dumiretso sa tanggapan ni Justice Secretary Vitaliano Aguirre kasama si NBI Director Dante Gierran.
Sa panayam sa abugado ni Wong Chu King na si Attorney Siegfried Fortun, sinabi niyang hindi napag-usapan sa pulong ang umano’y panunuhol ng may-ari ng Mighty Corporation kay Pangulong Duterte at ang pagpapaaresto sa kanya ng Pangulo.
Nagdedisyon, aniya, ang kanyang kliyente na makipag-tulungan sa NBI at DOJ upang linawin ang isyu ng umano’y pekeng Excise Tax Stamp sa mga produkto ng Mighty Corporation.
By: Avee Devierte / Bert Mozo
