Manhunt ops sa 3 natitirang miyembro ng ASG sa Bohol patuloy

Tuloy-tuloy ang manhunt operations ng militar para sa tatlong (3) natitirang miyembro ng Abu Sayyaf sa Bohol.

Ayon kay Clarin Mayor Allen Piezas, nakatanggap sila ng ulat na isa sa mga bandido ang naispatan sa Barangay Buenos Aires sa Tubigon.

Sinasabing nanghingi pa ang naturang rebelde ng tsinelas na agad namang inireport sa mga kinauukulan ng nakakitang residente.

Matatandaang kinilala ng awtoridad ang mga natitirang Abu Sayyaf members sa Bohol na sina alyas Asis, alyas Ubayda at Kaifar Sawadjaan alyas Abu Omarang na pinaniniwalaan ding si Alyas Saad.

Terror threat plot

Nadiskubre ng mga awtoridad ang mas malalim na balak ng Abu Sayyaf matapos ang pagsalakay ng mga pulis sa bahay ni Supt. Maria Cristina Nobleza sa Malaybalay City, Bukidnon.

Sa dokumentong nasabat ng mga pulis, nakasaad ang planong terror attack ng isang ASG member o leader na si al Mohammar Bayani na naaresto kasama ang dalawang (2) menor de edad at sumasailalim na sa interogasyon.

Nakasaad sa dokumento ang plano ng grupo na magtayo ng base o kampo sa Bohol na kalauna’y naunsyami matapos mapatay ang walo (8) sa labing-isang (11) bandidong dumating sa bayan ng Inabanga noong Mahal na Araw.

Gayunman, hindi pa mabatid ng pulisya kung may iba pang kasabwat na police officer si Nobleza sa pagtulong sa teroristang grupo.

By  Ralph Obina | Drew Nacino  

Comments

comments