Umapela ang Malakanyang sa mga tindero ng karneng baboy na ipagpatuloy ang kanilang pagtitinda.
Kasunod ito ng pagdedeklara ng “pork holiday” ng mga tindero kasabay ng unang araw ng pagpapatupad ng price freeze sa karneng baboy at manok.
Ayon kay Presidential Spokesperson Harry Roque, kanila nang inaasahan ang naturang tugon ng mga pork vendors dahil sa ipinaiiral na price cap.
Gayunman, hindi aniya dapat ito magtagal dahil kumikilos ang pamahalaan para matulungan ang mga magbababoy at nagtitinda.
Iginiit ni Roque, ginagawa ng pamahalaan ang lahat upang makakuha ng karneng baboy na maaaring isuplay sa Metro Manila at ubrang maibenta sa itinakdang price cap.
Alinsunod sa Executive Order 124, hindi dapat tumaas sa P270.00 kada kilo ang presyo ng kasim at pigue, P300.00 sa liempo at P160.00 kada kilo para sa dressed chicken.
