Nagpaabot ng pagbati ang Malakanyang sa pagkakasungkit ng gintong medalya ng Pinay marathoner na si Mary Joy Tabal sa 29th Southeast Asian Games sa Malaysia.
Ayon kay Presidential Spokesman Ernesto Abella, labis ang kanilang kagalakan at ipinagbubunyi ang isa na namang tagumpay ng atletang Pinoy.
Sinabi ng kalihim na hangad ng Palasyo ang tagumpay pa ni Tabal sa mga lalahukan pa nitong mga kompetisyon.
Kasabay nito, tiniyak din ni Abella ang suporta ng gobyerno sa mga atletang Pinoy at kaisa rin aniya ang pamahalaan sa hangaring manalo ang mga ito sa anumang larangan.
Ang panalo ni Tabal ay unang gintong medalya ng Pilipinas sa 2017 Sea Games.
