Mahigpit na pinababantayan ni Pangulong Benigno Aquino III ang lahat ng mga towers ng National Grid Corporation of the Philippines o NGCP.
Kasunod na rin ito ng panibagong pananabotahe sa tower 63 ng NGCP sa Aleosan, Cotabato.
Ayon kay Presidential Communications Group Secretary Sonny Coloma, inatasan na ng Pangulo si Energy Secretary Zenaida Monsada para pulungin ang inter-agency task force at tukuyin ang motibo ng pambobomba sa mga towers ng NGCP.
Kasabay nito, nanawagan ang Palasyo sa publiko hindi lamang sa Mindanao kundi sa Luzon at Cordillera na makipagtulungan sa gobyerno sa pagbabantay ng transmission lines para hindi masabotahe ng mga grupong gumagawa ng karahasan.
By Meann Tanbio | Aileen Taliping (Patrol 23)
