Pursigido si Pangulong Rodrigo Duterte na isulong ang Public Utility Vehicle Modernization Program (PUVMP) na matagal nang dapat ipinatupad.
Ito ang binigyang diin ni Land Transportation Franchising and Regulatory Board (LTFRB) chairman Martin Delgra III sa gitna ng pahayag ni Senador Grace Poe na hindi umano sapat ang P80,000 government subsidy upang i-modernize ang mga PUV partikular ang mga jeep.
Ayon kay Delgra, kabilang sa flagship project ng Duterte administration ang PUVMP na layuning i-angat ang kalidad ng transportasyon sa bansa.
Tanggap naman anya nila ang puna ni Senador Poe maging ang suporta ng Kongreso kung paano daragdagan ang tulong na maaari nilang ibigay sa mga operator at driver.
Sa katunayan ay ang Kongreso ang nag-apruba ng subsidya na P80,000 dahil ito mismo ay ang equity subsidy sa ilalim ng PUVMP.
Idinagdag pa ni Delgra na kung magpapasya ang Kongreso na itaas sa P200,000 hanggang P400,000 ang subsidy ay maaaring mapabilis ang implementasyon ng modernization program.
