Hindi na nakakaapekto sa bansa ang dating low pressure area (LPA) na huling namataan sa layong 415 kilometers northeast ng Pagasa Island, Palawan.
Patuloy namang binabantayan ang isa pang LPA na huli namang namataan sa layong 305 kilometers northeast din ng Pagasa Island, Palawan at papalabas narin ng Philippine Area of Responsibility (PAR).
Ayon kay Pagasa weather specialist Veronica Torres, mababa ang tsansa na maging bagyo ang panibagong LPA sa mga susunod na araw at hindi narin hindi nakakaapekto sa ating bansa.
Patuloy namang binabantayan ng Pagasa ang shearline o ang pagsasalubong ng malamig na hanging amihan at mainit na hangin o ang easterlies na nagmumula sa Pacific ocean na nakakaapekto sa southern Luzon at Visayas.
Dahil parin sa epekto ng shearline, inaasahang magiging maulan na may mga thunderstorm sa bahagi ng Bicol Region, Calabarzon, Mimaropa, Visayas area, maging sa Metro Manila at Central Luzon.
Wala namang inaasahang bagyo na papasok sa bansa hanggang sa susunod pa na araw pero iiral parin ang malakas na hanging amihan na nagdadala ng malakas na pag-ulan at malamig na panahon partikular na sa Cagayan Valley at cordillera Administrative Region (CAR).
Nagpaalala naman sa publiko ang Pagasa na makinig sa abiso ng mga lokal na pamahalaan; panatilihing maging alerto sa lagay ng panahon; doblehin ang pag-iingat lalo na sa posibleng pagbaha at pagguho ng lupa dulot ng mga pag-ulan; at magdala ng payong at iba pang panangga para sa biglaang pagbuhos ng ulan.