Lumobo na sa 91 porsyento ang local transmission sa Hilagang bahagi ng Mindanao batay sa pinakabagong tala ng Department of Health (DOH) ngayong araw ng Martes.
Ayon kay, DOH-Northern Mindanao Regional Director Dr. Jose Llacuna Jr. hindi ganito kataas ang naitatalang kaso ng Coronavirus Disease 2019 (COVID-19) sa Mindanao nitong nakaraang buwan at mas marami aniya ang gumagaling kumpara sa aktibong kaso.
Aniya, patuloy nilang hinihikayat ang publiko na makiisa sa pamahalaan sa pagsunod sa health protocols lalo na’t mas malaki ang posibilidad na magkahawaan sa mga lugar na maraming tao.
Kaugnay nito, nakapagtala nitong Lunes ang central DOH ng 230 bagong kaso ng COVID-19 sa Mindanao dahilan upang umakyat sa 2,922 ang bilang ng aktibong kaso at pumalo naman sa 25,511 ang kabuuang bilang ng kumpirmadong kaso ng nasabing virus.
Magugunitang nakasailalim ngayon sa Modified Enhanced Community Quarantine (MECQ) ang Cagayan de Oro City na tatagal hanggang Enero 15 bunsod ng patuloy na pagtaas ng kaso ng COVID-19 sa Lungsod.
