Sukatin ang kontrol ng China sa South China Sea.
Ito ayon kay strategic analyst Gre Poling ang nakikita niyang layunin ng Amerika sa pag-ikot ng military destroyer nitong USS Lassen sa artificial islands na ginawa ng China sa West Philippine Sea.
Wala aniyang layunin ang Amerika sa nasabing hakbang na subukan ang soberanya ng China sa pinag-aagawang mga isla kundi para mapilitan ang China na magpaliwanag sa kanilang claims sa South China Sea.
Sinabi ni Poling na sa ilalim ng maritime law ang mga artificial island ay hindi pinagbibigyan na akuin ang 12-mile territorial zone.
Inihayag pa ni Poling na sinadya ng US Navy na magpadala ng destroyer malapit sa Subi Reef para ma-testing ang strategy ng China at simple lamang aniya ang isasagot ng US sakaling umalma ang China, ito ay walang territorial seas para sa isang artificial island.
Si Poling ay director ng Asia Maritime Transparency Initiative na nakabase sa Center for Strategic and International Studies sa Washington.
Di paglabag sa kasarinlan ng bansa—Angara
Samantala, hindi maituturing na paglabag sa kasarinlan ng bansa ang pagpapatrolya ng barkong pandigma ng Amerika sa artificial island na gawa ng China sa West Philippine Sea.
Ayon kay Senador Edgardo Angara, Vice Chairman ng Senate Committee on Foreign Relations, hindi magkaka-problema kung joint patrol ang gagawin ng Philippine at US military dahil nakabase ito sa Mutual Defense Treaty at VFA o Visiting Forces Agreement.
Sinabi ni Angara na malaking tulong ang Amerika dahil hindi sapat ang kakayahan ng bansa na mabantayan ang mga karagatan at teritoryong sakop nito dahil sa kakulangan ng budget para sa AFP modernization.
By Judith Larino | Cely Bueno (Patrol 19)