Isinailalim ng Capiz provincial government sa State of Calamity ang lalawigan dahil sa malawakang pagbaha noong nakaraang linggo dahil sa bagyong Agaton.
Batay sa ipinasang resolusyon ng provincial board, pinapayagan nito ang paglalabas ng mahigit sampung milyong pisong assistance sa mga apektadong residente, lalo na sa pagkain, tubig at mga damit.
Pinahintulutan din nito si governor Esteban Evan Contreras na pumasok sa isang Memorandum of Agreement sa Philippine Red Cross para sa pamamahagi ng calamity funds sa mga nasabing residente.
Nabatid na maraming bayan sa naturang probinsya ang binaha mula noong Abril 11 hanggang Abril 15 nang humagupit ang bagyo kung saan nasa 215K residente ang napilitang lumikas sa kanilang mga tahanan.
19 na residente naman ang namatay kabilang ang isang pasahero ng isang bangka na tumaob sa kasagsagan ng nabanggit na bagyo.
