Hindi kumbinsido si Senador Panfilo Lacson sa pahayag ni Budget Secretary Benjamin Diokno na walang nakasingit na Pork Barrel Fund sa panukalang pambansang pondo para sa susunod na taon.
Giit ni Lacson, lumang tugtugin na aniya ang ganitong alibi ng Budget Department bago, habang at pagkatapos ng budget deliberations taon-taon kaya’t makabubuti aniya para sa Malakanyang na maging tapat hinggil dito.
Paano aniya ipaliliwanag ng Budget Department ang malalaking lump sum budget ng maraming ahensya ng pamahalaan tulad ng Department of Public Works and Highways (DPWH) gayundin ng Department of Education (DepEd) at Department of Agriculture (DA).
Kinuwesyon muli ni Lacson ang pagsusumite ng mga mambabatas ng kanilang listahan ng proyekto bago ang period of amendments gayung matagal nang ibinasura ng Korte Suprema ang paglalaan ng mga Pork Barrel Funds.
By Jaymark Dagala | Ulat ni Cely Bueno
