Kinumpirma mismo ni Atty. Michael Poa, isa sa mga legal counsel ni Vice President Sara Duterte, na nasa Pilipinas lamang ang Bise Presidente.
Sa gitna ito ng kumakalat na espekulasyon na nasa ibang bansa si VP Sara, partikular sa Kuwait.
Ayon kay Atty. Poa, nakausap niya ang opisyal para magbigay ng update kaugnay sa naging takbo ng impeachment kung saan in-archive ng mataas na kapulungan ng Kongreso.
Tikom naman ang abogado hinggil sa impormasyon ng mga aktibidad ng Pangalawang Pangulo, lalo’t hindi na siya direktang bahagi ng Office of the Vice President.
Matatandaang nagtungo sa Marinduque ang Bise Presidente para mamahagi ng school bags sa mga kabataan, ngunit matapos nito ay hindi na muli siya namataan sa mga public events.—sa panulat ni Daniela De Guzman
