Nanindigan si Philippine National Police (PNP) Chief Director General Ricardo Marquez na nanatiling prayoridad ng PNP-Highway Patrol Group ang paglaban nito sa mga carnapper.
Ito ay sa kabila ng pagkakatalaga ng PNP-HPG para magmando ng trapiko sa EDSA.
Ayon kay Marquez, habang ang ibang mga miyembro nito ay nasa EDSA ay patuloy pa rin ang ginagawang pagkilos ng hpg laban sa carnapper at hijacker.
Bukod sa pagpapakita ng disiplina sa EDSA, hinimok ni Marquez ang publiko na maging bigilante at maging mapagmatyag sa paligid sa posibleng pagkilos ng mga carnapping group.
Sinabi pa ni Marquez na magiging bahagi na ng mas pinaigting na operation lambat sibat ang pagbisita at inspeksyon sa mga business establishment na nagtitinda ng second hand na motor vehicle upang mabantayan ang bentahan ng mga nakaw na sasakyan.
QC, carnapping capital
Nanatili pa rin ang Quezon City bilang carnapping capital ng Pilipinas.
Ayon sa datos ng PNP-Directorate for Investigation and Detective Management sa 486 na kaso ng carnapping ang naitala ay 213 sa mga ito ang naitala ng Quezon City Police District simula noong Enero 5 hanggang Setyembre 6 ngayong taon.
Habang 88 naman sa Eastern Police District, 72 sa Northern Police District, 59 sa Manila Police distRict at 57 naman ang naitalang kaso ng carnapping sa Southern Police District.
Aabot naman sa 44 na posyento ng mga nanakaw na sasakyan ay nasa mga kalsada habang 29 na porsyento ay mula naman sa residential areas.
Higit kahati sa mga ninakaw na sasakyan nakuha habang naka-parada habang ang maliit na porsyento nito ay nakuha sa pamamagitan ng paggamit ng puwersa.
By Rianne Briones