Aabot sa 1,685 na mga pangalang tumanggap ng confidential funds ang natukoy na walang record ng birth, marriage, at death certificate sa Philippine Statistics Authority.
Ito ang kinumpirma ni PSA Assistant National Statistician Marizza Grande sa nagpapatuloy na impeachment trial laban kay Vice President Sara Duterte kaugnay pa rin sa Article 1 o maling paggamit ng confidential funds.
Batay sa pagsusuri ng PSA, sa 2,669 na pangalang sinasabing payee ng confidential funds, 1,992 ang natukoy mula sa OVP at 677 na mula DepEd na tumanggap noong 2022 at 2023.
Sa nagpapatuloy na paglilitis, binigyang-diin ng witness stand na unusual ang naturang mga pangalang ginamit, kabilang ang 1,685 na walang record ng kapanganakan, kasal, o kamatayan sa PSA.
Natuklasan din na sa 20 pangalan ng OVP ay tumugma sa mga rekord ng mga bata, habang lima naman ay mula sa DepEd kung saan, tatlo sa mga nabanggit ay wala pang tatlong taong gulang, kabilang na sina Beatrice Cuenca, Mikay Delos Reyes, at Marlin Sunga.
Bukod sa naturang mga pangalan, kinumpirma rin ni Grande na walang civil registry record sa PSA ang mga pangalang sina Mary Grace Piatos, Milky Secuya, at Kokoy Villamin. | Sa panulat ni Geli Mendez
