Naglaan ng P5M donasyon ang kamara para sa mga residenteng nasunugan sa Navotas City kamakailan.
Matatandaang lima ang naitalang nasawi habang dalawa naman ang nasugatan sa pagsiklab ng sunog sa isang residential area sa Barangay Bagumbayan North kung saan, nananatili pa rin sa kalsada bitbit ang mga naisalbang gamit ang mga nasunugang residente.
Ang iba naman sa mga naapektuhan ng sunog ay pansamantala pa ring nananatili sa mga court sa nabanggit na lugar.
Ayon kay House Speaker Martin Romualdez, ang inisyal na tulong ay galing mismo sa mga miyembro ng mababang kapulungan.
Bukod sa P5M in-cash, magkakaroon din ng in-kind donations ang Kamara tulad ng bigas at canned goods na tatanggapin ng lungsod sa pangunguna ni Navotas Rep. Toby Tiangco.
Nagpaabot naman ng pakikiramay ang Kamara sa mga pamilyang naiwan ng mga nasawing biktima.
