Patuloy na humahaba ang listahan ng mga kahina-hinalang pangalan na sinasabing nakatanggap ng confidential funds ng Office of the Vice President.
Ito ay matapos ibunyag ni House Deputy Majority Leader Paolo Ortega V ang binansagang “Team grocery” dahil hango ang mga bagong pangalan sa mga nabibiling produkto sa palengke o grocery.
Kabilang sa nasabing listahan sina Beverly Claire Pampano, Mico Harina, Patty Ting, Ralph Josh Bacon at Sala Casim.
Tulad ng mga naunang inilabas na pangalan, isiniwalat ni Cong. Ortega na walang record of birth, marriage o death ang mga ito sa Philippine Statistics Authority.
Nauna nang lumutang ang mga kahina-hinalang pangalan na tumanggap ng OVP confidential funds na hango naman sa mga brand ng chichirya at cellphone, uri ng prutas, at iba pa. —sa panulat ni John Riz Calata
