Nakikipag-ugnayan na ang Joint Task Force coronavirus disease 2019 (COVID-19) shield sa Philippine National Police-Highway Patrol Group (PNP-HPG) gayundin sa mga local police commander sa Metro Manila.
Ito’y para linisin at bantayan ang inilagay na mga bicycle lanes ng Metro Manila Development Authority (MMDA) sa kahabaan ng EDSA.
Ayon kay Joint Task Force COVID-19 Shield Commander P/Ltgen. Guillermo Eleazar, nakatatanggap sila ng mga reklamo mula sa social media na tila binabalewala ng mga motorista ang inilagay na bike lane.
Pagpapakita aniya ito ng kawalang respeto ng mga motorista sa mga biker at inilalagay din nila sa alanganin ang seguridad at kaligtasan ng mga ito.
Dapat na aniyang masanay ang lahat sa new normal kung saan, bahagi na ng transportasyon ng mga Pilipino ang mga bisikleta.
Sa kasalukuyan, mayruon nang inilagay na bike lane sa mga lungsod ng Taguig, Pasig at Quezon City.
