Nais paimbestigahan ni deputy minority leader at Marikina Rep. Stella Quimbo sa Kamara ang isinasagawang hakbang ng PhilHealth hinggil sa isyu ng korapsyon sa nararanasang COVID-19 pandemic.
Ayon kay Quimbo, kailangang pag-aralan mabuti ang mga aksyong inilatag ng PhilHealth sa anomalya sa national health insurance program partikular na sa interim reimbursement mechanism (IRM) at case rate system.
Ito’y dahil natapos na ang unang bahagi ng taon ay wala pa rin naibibigay na report ang PhilHealth sa kongreso ukol sa repormang ginawa matapos masangkot sa mga corruption issues sa bansa.
Magugunitang, nagkaroon ng anomalya sa IRM ang pondong inilabas ng PhilHealth sa mga rehiyong wala talagang kaso ng COVID-19 habang hindi man lang nabigyan ang ilang lugar na may mataas na bilang ng kaso ng virus sa bansa.
Maliban dito, nais rin ni Quimbo na magbigay ng update ang PhilHealth sa isyu ng care rate system tungkol sa underpayment at overpayment sa mga COVID-19 cases.
Aniya, kailangan din imbestigahan kung ano ang naging solusyon ng ahensya sa paggamit ng pondo at malaking utang nito sa mga pribadong sektor. — sa panulat ni Rashid Locsin.