Sa kabila ng banta ng pandemya, hindi napigilan ang mga senior citizen mula sa Barangay Ermita, Cebu City na magtipon-tipon para kalampagin ang kanilang barangay officials hinggil sa financial aid na hindi parin umano naibibigay sa kanila.
Ayon sa ulat, nagbigay na umano ng paunang abiso ang mga opisyal ng barangay na ihahatid mismo sa kani-kanilang mga bahay ang P4,000 na financial aid para sa mga nakatatanda.
Magugunitang, makailang ulit nang sinabi ng Department of Health (DOH) na kabilang ang mga senior citizen sa mga sektor na madaling mahawaan ng COVID-19.
Nabatid sa mga opisyal ng barangay na ilan sa mga nakatatanda na kabilang sa mga nagtipon-tipon ay hindi sumusunod sa social distancing at wala ring suot na face masks.
Samantala, katuwang naman ng barangay ang pulisya sa pagkontrol sa mga senior citizen na nasa harap ng barangay hall ng Brgy. Ermita.
