Hindi magpapadalos-dalos ang militar hinggil sa pagpapatupad ng Anti-Terrorism Law hangga’t walang inilalabas na Implementing Rules and Regulations para rito.
Ayon kay Western Mindanao Command (WesMinCom) Chief Lt/Gen. Cirilito Sobejana, mahalaga ang pagkakaroon ng sapat na kaalaman sa hanay ng mga sundalo at publiko sa batas bago ito ipatupad.
Naniniwala ang heneral na wala nang tututol sa Anti-Terror Law kung magkakaroon ng sapat na kaalaman ang mga sundalo hinggil sa batas at naiintindihan din ito ng publiko.
Nanindigan si Sobejana na malaking maitutulong ng nasabing batas sa kanilang kampaniya kontra terrorismo dahil halos lahat ng local na mga terrorista ay nag-ooperate sa kanilang lugar na nasasakupan tulad ng Abu Sayaf, BIFF at Maute Terrorist Group.