Hiniling ng isang mambabatas sa Kamara na gawing iisa na lamang ang imbestigasyon kaugnay sa mga ‘ninja cops’ na kinasasangkutan mismo ng pinuno ng pambansang pulisya.
Ayon kay Kabataan partylist Rep. Sara Elago, independent probe aniya ang kailangan sa usapin at hindi na dapat ito sawsawan ng iba pang mga ahensya ng pamahalaan upang hindi na ito mabahiran ng kulay.
Kasunod nito, hiniling din ni Elago na dapat sampahan ng kaso si Philippine National Police (PNP) chief P/Gen. Oscar Albayalde sakali aniyang mapatunayang sangkot nga ito sa mga ‘ninja cops’ o di kaya’y nagpabaya nga ito sa tungkulin.
Giit ni Elago, ang pagkakadawit ni Albayalde sa usapin ay isang malinaw na pagpapatunay na walang kuwenta ang war on drugs ng pamahalaan.
Bagay na mariing namang itinanggi sa DWIZ ni dating Criminal Investigation and Detection Group (CIDG) chief at ngayo’y Baguio City Mayor Benjamin Magalong na siya umanong bumalangkas ng mga panuntunan hinggil dito.
Ay hindi po (totoo na walang kuwenta ang war on drugs). Yung panahon namin ni General Bato (Dela Rosa), ako po yung head ng oversight committee sa anti-drug campaign at nakita ko naman na madaming pa ring matitinong pulis diyan na talagang maayos ang kanilang operation laban sa iligal na droga,” —Baguio City Mayor Benjamin Magalong sa panayam sa DWIZ.