Pinaiimbestigahan ng Department of Justice o DOJ sa National Bureau of Investigation o NBI ang umano’y scam sa Priority Development Assistance Fund at Disbursement Acceleration Program o DAP na naganap sa ilalim ng nakalipas na administrasyong Aquino.
Kasunod ito ng inihaing reklamong malversation ng grupong Coalition for Investigation ang Prosecution na pinamumunuan ni dating Manila Councilor Greco Belgica.
Sa kanyang memorandum, inatasan ni Aguirre ang National Bureau of Investigation o NBI na bumuo ng special task force na magsisiyasat kung nagkaroon ng malversation sa panig ni Aquino at ng ibang mga dating opisyal ng pamahalaan.
Kasabay nito, pinasusumite ni Aguirre ang NBI ng periodic reports sa isasagawa nitong imbestigasyon.
Inaakusahan ng grupo ni Belgica si dating Pangulong Noynoy Aquino at iba pang opisyal nito ng pagwawaldas sa kanilang PDAF at DAP noong sila pa ang namumuno sa bansa.
Matatandaan na inabswelto ng Ombudsman si dating Pangulong Noynoy Aquino sa technical malversation na isinampa laban sa kanya dahil sa di umano’y maanomalyang pagpapatupad ng DAP.
—-
