Nanawagan ang Joint Task Force Sulu sa kanilang mga nasasakupan na ipagpatuloy ang pakikiisa gayundin ang pakikipagtulungan upang pigilan ang galaw ng mga terroristang grupo.
Ito’y ayon kay Joint Task Force Sulu Commander, MGen. Juvymax Uy kasunod ng pagkakatagpo ng Militar sa pabrika ng bomba ng Daulah Islamiyah sa Brgy. Pagatin, Shariff Saydona Mustapha sa Maguindanao.
Ayon kay Uy, pinaniniwalaang ino-operate ng Emir ng Daulah Islamiyah Turaiffe Group na si Ustadz Esmael Abdulmalik ang naturang pabrika ng bomba.
Nasamsam sa naturang lugar ang 12 iba’t-ibang container type na mga Improvised Explosive Devices (IED), mga sangkap sa paggawa ng pampasabog, anti – personnel claymore mine, rocket propelled granade, laboratory at electronic equipment.
Kasunod nito, inihayag ni Uy na malaking dagok para sa terroristang grupo ang pagkakadiskubre ng Militar sa pabrika ng bomba dahil magiging balakid ito sa kanilang mga binabalak na paghahasik ng karahasan.