Muli nang nagpatuloy ang bakunahan kontra COVID-19 sa hanay ng Philippine National Police (PNP).
Ito’y makaraang matanggap na ng PNP ang halos nasa 10,000 doses ng anti-COVID-19 vaccine na Sputnik V mula sa pamahalaan.
Ayon kay Administrative Support to COVID-19 Operations Task Force (ASCOTF) Commander at Deputy Chief PNP for Administration P/Ltg. Joselito Vera Cruz, 2,400 doses dito ang ibibigay sa National Capital Region Police Office (NCRPO).
Habang ang nalalabi ay ibubuhos para sa mga pulis na nasa ilalim ng A-1 hanggang A-4 priority category kung saan, target nilang maturukan ang nasa 1,500 tauhan kada araw.
Paglilinaw ni Vera Cruz, bukod pa aniya ang dumating na mga Sputnik V vaccine sa 28,000 doses na inilaan ng Department of Health (DOH) para sa NCR.
Batay sa datos ng PNP ASCOTF, nasa mahigit 55,000 tauhan ng PNP ang nabakunahan na kontra COVID-19 kung saan, mahigit 16,000 rito ang nakakumpleto na ng dalawang dose ng bakuna.
