Suportado ni Senador Sherwin Gatchalian ang plano ng gobyerno na isama na ang kabataan sa coronavirus disease 2019 (COVID-19) vaccination program.
Ayon kay Gatchalian, kailangan pag-aralan mabuti ng gobyerno ang ginagawang diskarte ng ibang bansa sa pagbabakuna sa mga menor de edad at kabataan.
Paliwanag pa ni Gatchalian, ang ginagawa sa US ay may gabay ng kanilang Center for Disease Control and Prevention at may suporta ng American Academy of Pediatrics.
Sinabi pa ni Gatchalian na dapat magsimula na ang local government units (LGUs) sa paghahanda para sa pagbabakuna ng mga kabataan.
Bukod dito, kailangan din aniya na magsagawa ng information campaign ukol sa kaligtasan ng bakunang ituturok sa mga menor de edad.
Sa ngayon, hindi pa maaaring bakunahan dito sa bansa ang mga 17 taong gulang pababa, habang sa Amerika ay nababakunahan na ang 12 hanggang 15 taong gulang.
Samantala, binanggit ni Gatchalian na kailangan ng P20-bilyon para mabakunahan ang menor de edad at kabataan sa bansa.