Hinamon ni dating Health Secretary Janette Garin ang dating consultant ng Department of Health o DOH na maglabas ng mga ebidensya kaugnay sa ibinunyag nitong mafia sa loob ng departamento.
Kasunod na rin ito nang pagtanggi ni Garin sa DOH mafia na ibinunyag ni Dr. Francis Cruz noong panahong nasa puwesto pa ang dating Health Secretary.
Ayon kay Garin, hindi niya kilala si Cruz at hindi niya rin ito nakatrabaho bagamat naririnig na niya ang pangalan nito na kinukunsidera bilang undersecretary ni dating Health Secretary Paulyn Ubial.
Muli ring itinanggi ni Garin ang alegasyon ni Cruz hinggil sa mga ghost projects noong panahon niya bilang kalihim ng DOH.
Duda si Garin na may nasa likod ng nasabing hakbangin ni Cruz.
Una nang ibinunyag ni Cruz na ang nasabing mafia sa loob ng DOH na kinabibilangan ni Garin at iba pang dati at kasalukuyang opisyal ng ahensya ang nakinabang sa pagbiling kontrobersyal na dengvaxia at iba pang maanomalyang proyekto sa DOH.
—-
