Muling nagbanta ng panibagong balasahan si PNP Chief P/Gen. Archie Francisco Gamboa sa lahat ng kaniyang mga Regional Directors sa buong bansa.
Ito’y sakaling mabigo ang mga ito na magsumite sa kaniya ng listahan ng mga kolektor at protektor ng iba’t-ibang illegal na sugal partikular na ang jueteng.
Ayon kay Gamboa, binibigyan niya ng isang linggo ang mga Regional Directors para sundin ang kaniyang utos kung hindi ay masisibak agad ang mga ito sa puwesto.
Una rito, nagdududa ang mga anti-jueteng advocate sa tila pagiging tahimik ng PNP sa usapin ng jueteng sa kabila ng maigting na kampaniya nito kontra illegal na sugal.
Pero sa sagot ni Gamboa, hindi ningas kugon lang ang kanilang laban kontra illegal na sugal at patunay na rito ang “no take policy” na kaniyang mahigpit na ipinatutupad.
