Testamento o katibayan daw ng epektibong kampanya ng Duterte administration laban sa ilegal na droga, kriminalidad at katiwalian ang pagkakasama ng Pilipinas sa “Top 50 Nations” na itinuturing na pinakaligtas at may kumpiyansa ang publiko sa pulisya at iba pang law enforcement agency.
Ito ang inihayag ni administration senator Christopher Bong Go.
Giit ni Senator Go, mas pahuhusayin pa ang kampanyang ito laban sa krimen at katiwalian kaya mas mararamdaman ng publiko na mas ligtas ngayon ang mga komunidad at naipatutupad ang mga batas.
Reaksyon ito ni Sen. Go sa lumabas na Gallup 2020 Global Law and Order report na ginawa ng analytics and advisory firm sa America na Gallup.
Sa report, nakakuha ang Pilipinas ng score na 84 out of 100 katulad ng Australia, New Zealand, Poland at Serbia.
Sa survey, inalam ang pakiramdam ng mga tao sa kanilang personal security at kanilang karanasan sa crime at law enforcement sa mga na survey dito, marami umano ang nasiyahan sa law enforcement agencies.
Sa kabila nito sinabi ni Go na hindi pa dapat magpakakampante ang militar, pulisya at lahat ng law enforcers sa kabila ng mataas na score sa nasabing survey.
Utos pa rin daw ng Pangulo na pagbutihin ang paglaban sa krimen at sasabayan ito ng paglikha ng mga batas para masuportahan ang kampanya laban sa krimen at katiwalian tulad ng isinusulong niya na death penalty bill. — ulat mula kay Cely Ortega-Bueno (Patrol 19)
