Umapela sina Manila Representative Bienvenido Abante at Laguna Representative Dan Fernandez sa Department of Justice na sampahan na ng kasong kriminal si dating Pangulong Rodrigo Duterte, gamit ang mga lumabas na impormasyon sa kanilang imbestigasyon kaugnay sa drug war campaign ng kanyang administrasyon.
Sinabi ni Congressman Abante na handang ibigay ng komite ang kanilang nakalap na impormasyon sakaling hingin ito ng DOJ.
Sa panig naman ni Congressman Fernandez, sinabi nitong ang mga testimonya ni dating pangulong Duterte sa Senate hearing na inaako niya ang buong responsibilidad para sa tagumpay at kabiguan ng kampanya kontra droga ay malaki ring basehan ng pagsasampa ng kaso.
Binigyang-diin ng dalawang kongresista na bagama’t mariin ang kanilang pagtutol sa iligal na droga, hindi pa rin sila pabor sa polisiya ng dating pangulo. - sa panulat ni Laica Cuevas
