Pinabibilisan ng DILG sa PNP-Program Management Office ang pagpapalabas ng financial assistance para sa pamilya ng mga nasawi at nasugatan mga pulis sa naganap na misencounter sa Samar noong Lunes.
Huhugutin sa CSBP o Comprehensive Social Benefits Program ang Financial Assistance na ibibigay sa pamilya ng mga nasawi at nasugatang pulis.
Ayon kay DILG OIC Secretary Eduardo Año, makakatanggap ng P 500,000 ang kada pulis na kabilang sa KIA o Killed in Action o KIPO Killed in Police Operation.
P150,000 naman aniya ang makukuha ng pulis na wounded in action o wounded in police operation na may total permanent physical disability.
Samantala, P100,000 naman ang ibibigay sa pamilya ng mga pulis na wounded in action o wounded in police operation na may major at minor injuries.
Bukod pa ito sa shelter assistance na nagkakahalaga ng P450,000 na ibibigay sa bawat pamilya ng pulis na nasawi at nasugatan sa engkuwentro.
Maliban pa rito ang health care assistance mula sa philhealth na nagkakahalaga ng P2,400 kada taon at maintenance medicines mula sa DOH.
Tiniyak din ni Año na mabibigyan ng educational assistance ang dalawang anak at iba pang beneficiary ng mga namatay at nasugatang pulis.
